Kan member boral

Vawiin 21.3.2011 (Thawhtanni) tlaiah khan kan KTP member Pu Biakthanliana kum 38 Hosea Group member chu Serchhip Damdawi Inah TB natna in a boral. Zanin lumen a ni ang a, naktuk ah vui a ni ang. Lusun chhung te KTP ten kan tawrhpui takzet.

Mapuiin pasal nei

Ni 17.3.20111 khan kan member Nl R. Lalchhuanawmi chuan Sialsuk Presbyterian Kohhran Biak inah Kohhran Dan Thianghlimin pasal, Zothangliana Sialsuk khua a nei. Nl Mapuii thlahna hi ni 16.3.2011 ah an chenna inah neih a ni, KTP hmingin lawmpuina thilpek leh thuziak hlan a ni.

Tv C. Zolianmawia Missionary in kal dawn

Kan memberpui Tv. Zolianmawia chu Bawngkawn Chhim Veng Kohhrana mi thahnemngai intelkhawm leh kan Kohhran tang kawp tirhin Arunachal Pradesh-ah Missionary-in a kal dawn a. Tv C. Zolianmawia hian ni 16.3.2011 khian Serchhip a chhuahsan ang. Amah thlahna hi ni 13.3.2011 zan Kohhran Inkhawmah neih a ni a, tlai KTP Fellowship naah ama pualin hun hman a ni bawk. KTP te chuan amah thlah nan Citation leh pawisa fai Rs 1500/- kan pe.

Branch Chanchinbu 'Thalai Eng' Dt 13.3.2011 Issue a Thalai Eng in Tv C. Zolianmawia an kawmna:

(Thalai Eng - T.Eng, Tv. Zolianmawia - Zova.)

T. Eng : I pianni leh thla,i nu leh pa hming, in unau zat min hrilh thei em?
Zova : Ni 20.4.1991 a piang ka ni a. Ka pa chu Dengchhinga niin ka nu chu Lallawmzuali a ni a. Kan unau hi 7, mipa 4 leh hmeichhia 3 kan ni a, a naupang lam atanga chhiara 3-na ka ni.

T. Eng : Thlarau bo vei mi i nih zia leh tawng pawh thiam lova state dang hial pawh lo kal tawh i ni tih kan hria a. Hetia hun puma thawk tura missionary meuha i lo chhuah dawn takah hian zamna leh huphurhna a awm ve duh viau lo maw ?
Zova : Keimah lam ka inen chuan huphurhna leh zamnate chu nei ve tehreng mai. Mahse ka rilruah II Kor. 3:5-6 thu hi a lo lang a, chu chuan min hnemin ka thla a timuang a, ka huphurhna leh zamnate chu a lo kiang ve duak thin a ni.

T. Eng : Tunhma-in Missionary a kal hi i rilruah a lo awm tawh thin em ?
Zova : Ka pianthar hma pawhin Pathian rawngbawlna lam hi chu ka ngai ropui viau nachungin Missionary-a kal hi chu rilru-ah a awm em em lo. Mahse hun engemaw lai atang khan thlarau bote veina hian ka thinlungah hmun thuk tak luah tanin missionary-a kal duhna rilru hi ka lo nei ve ta a ni.

T. Eng : Missionary-in i chhuak dawn tih i inhriat tirhin i rilru-ah enge lo lut hmasa ber ?
Zova : Ka thinlungah thu tam tak a lo lut ve a, chung zinga langsar ber chu “Lalpa’n Amah hrelote hnenah a rawngbawl min phalsak ve a ni” tih hi a ni a, chu chuan min tilawm em em a ni.

T. Eng : Hetia Missionary-a i kal tur hi i chhungten engtin nge an ngaih ?
Zova : Ka chhungte chuan min tuipui-in tha an ti hle a ni.

T. Eng : Missionary hna i lo hmuh thin dan leh ngaihdan min hrilh thei em?
Zova : Missionary hna hi kei chuan thlarau leh tihtakzeta hmangaihna tak tak nena kan thawk a nih chuan a hluin a ropui ka ti a. He khawvela kan awm chhung hi chuan ama rawngbawl baka hlu hi a awm thei dawn em ni ka ti.

T. Eng : I thawhdan tur tlangpui min hrilh thei em ?
Zova : Ka thawhdan tur tak hi ka la hrechiang thei bik lo a ni.

T. Eng ; Bible chang duh ber leh hla duh ber i nei em ? I neih chuan min han hrilh ta che.
Zova : Bible chang ka innghahna leh min hneh thintu chu Luka 10: 21, 22 thu hi a ni a, hla lamah chuan KHB No.455-na, ‘Tunah a thar hmangaihna eng nuamah’ tih hla hian ka thinlung a hneh thei khawp mai.

T. Eng : Missionary-in min kalsan dawn a ni a, Kohhran mipuite min chah duh han ngaih pawimawh bik riau i nei em ?
Zova : A hmasa-in kan hriat theuh angin hei Mizoram pawnah tawng leh an hnam nunphung pawh hriatlohna-ah kan awm dawn a ni a, chuvangin Kohhran mipuite thlarau leh tihtakzeta min lo tawngtaipui thin turin ka sawm che u a ni. Tin, Pathian leh a Kohhran hote hi he khawvel hrehawmna rama cheng kan ni a, chuvangin chaklohnaten min tuamin min chim thin mah se englai pawha hnai reng, min kalsan ngailo leh harsatnate lungngaihnaten min chimlai pawha tanpui min tiam tlattu Isua hi hrereng ang u. Amah chauh hi engkima kan engkim, min hruaitu leh min vengtu-ah thlangin a hnenah chauh hian kan thlamuanna tak tak hahchawlhna famkim a awm a ni tih hria-in Amah chauh hi i bel tlat ang u tih te hi Kohhran mipuite ka chah ve duh chu a ni e.

Nl Dini'n pasal nei

Kan member Nl H. Laldinpuii chuan ni 11.3.2011 (Zirtawpni) Chawhma dar 11:00 khan Serchhip Bazar Kohhran Biak inah Malsawmsanga, Serchhip Tuikhuah Veng chu Kohhran Dan Thianghlimin 'Tiam tlat e' a tih pui. Nl Dini hi KTP ah active memebr niin Evangelical Cell leh Group ah te pawh hruaitu ni thin a ni, pasal duhawm tak a nei hi KTP member ten kan lawmpui hle.

SMS Group siam a ni

Hmar Veng Branch KTP SMS Gupshup siam a ni a, a join duh te tan 'Hmar Veng_BrKTP' tih SMS Type in 09219592195 ah thawn mai tur a ni e. KTP Branch news leh hriattur tul hrang hrang te chu heta tang hian member te hnenah hrilhdarh thin a ni ang.

KTP Fehchhuah Programme hman a ni

Ni 1.3.2011 zanah Branch KTP 'FEHCHHUAH' Programme hman a ni a, he hun hmanaah hian KTP member 35 kalkhawmin thil chi hrang hrang kenkhawm a ni. He hun hmanna Biakin sak laia neih hi Tv Vanlalhruaizela Kawlni, Branch Comt member chuan a kai hruaia, member te thil kenkhawm te hi Pu Peter Lalzuitluanga, Branch Comt member leh Pu Lalnunngila, Branch Comt member ten an lilam a, heng an lilamna atang hian sum Rs 3794/- hmuh a ni a, tin member thahnem ngai ten a sum faia an kenkhawm hi Rs 486/- a ni bawk a, hemi zana sum hmuh zawng zawng belhkhawm hi Rs 4280/- a tling a ni.